Loron ida iha suco ida, Ema nia aman ida mosu derrepenti no avizu ba ema sira iha suco laran katak nia hakarak sosa lekirauk, ho folin $10 kada lekirauk. Haree ba lekirauk iha ai-laran barak loos, ema sira iha suco laran komesa ba kaer.
Ema nia aman ne’e sosa lekirauk rihun ida ho folin $10 kada lekirauk. Wainhira lekirauk iha ai-laran menus ona, ema iha suco laran komesa para buka tan lekirauk. Ema nia aman ne’e mosu fali mai no anunsia katak nia hakarak atu sosa tan lekirauk no prontu atu sosa ho folin $20 kada lekirauk.
Ho folin ne’ebé aas tan ne’e, ema sira iha suco laran ba buka tan lekirauk to’o iha foto leten sira. konsege kaer lekirauk 500 no fa'an ho folin $20. La kleur, lekirauk iha ai-laran mos komesa menus tan ba bebeik no difisil liu tan atu kaer. Ema komesa para buka lekirauk no fila fali sira nia toos ho natar.
Ema nia aman ne’e hasa’e tan folin. Nia prontu atu sosa ho folin $25 kada lekirauk, maibé agora ema sira iha suco laran susar los atu kaer lekirauk. Oinsá atu kaer, haree hetan deit lekirauk nia oin iha ai-laran mos susar los ona. Tamba ‘persediaan’ laiha duni ona.
Atu dada nafatin ema sira iha suco laran, ema nia aman ne’e avizu tan katak, $25 ne’e la to’o. Se mak iha lekirauk, nia hakarak sosa ho folin $50 kada lekirauk. Maibé, tamba ema nia aman ne’e tenki halo viajen ofisial ida ba li’ur, nia hameno hela ninia asistente mak urus fodik.
Wainhira ema nia aman ne’e ba hela, ninia asistente ne’e koalia ho ema sira iha suco, “Imi haree took lekirauk sira uluk hau nia Xefi sosa no tau iha gudang laran ne’e. Hau fa’an fali ba imi ho folin $35 kada lekirauk. Wainhira hau nia xefi fila fali mai, imi fa’an fali ba nia ho folin $50 kada lekirauk hanesan nia dehan ne’e.”
Ema sira iha suco laran mos, komesa hasai sira nia osan hodi sosa hotu lekirauk sira ne’e ho folin $35 kada lekirauk. Liu tiha ida ne’e, ema nia aman ne’e ho ninia asistenti nia oin nunka mosu tan iha suco ne’e nia laran. Sira halai lakon tiha. Lekirauk mak agora lemo-lemo los iha suco ne’e nia laran.
Liu tiha, ema sira iha suco laran ne’e foin hatene katak, sira lakon osan barak tamba sira afinal sosa fali lekirauk ne’ebé uluk sira rasik mak buka ne’e ho folin aas liu no agora sira la hatene atu halo saida ho lekirauk sira ne’e.
Tradusaun husi fontes iha lian Ingles : Billito Soares
0 comentários: