Foin remata te’in hotu hahán kalan nian, hau nia kakutak la para hanoin no sukat hau nia-an. Fihir dadaun hahán ne’e, buat ne’ebé mosu iha hau nia kakutak mak, hau ne’e ‘spoiled’ liu. Maske dalaruma han supermi hela deit tamba sibuk, maibe kuandu iha tempu atu te’in, na’an ho modo nia quantidade sempre barak liu etu. La’os tamba hau mak hakarak, maibé hau bele dehan deit difisil atu sukat modo ka na’an ba porsi ba ema ida nian deit tuir standar Timor. Naumedigas, hau atu te’in na’an pedasuk rua ka tolu iha tasu? ou modo tahan ida ka rua? (ba ema ida nian deit).
Maibé hanesan hau dehan, hau sente-an ‘spoiled’ tamba se hanoin didiak, iha hau nia rai, ema balu dalaruma susar atu hetan hahán, familia barak mak susar atu sosa na’an ba oan sira iha semana ida nia laran, ka fulan ida nia laran. Atu ekilibra ida ne’e hau nia maluk sira barak liu mak han etu barak (foho ramelau) maibé modo kuaze hanesan infeita deit etu (katak uitoan los).
Hanoin hirak ne’e hotu halo hau hanoin teb-tebes hau nia familia iha Timor liu-liu pai ho mae.. jangankan han etu mak barak liu fali na’an ka modo, dalaruma sira la han liu kedas. Máximu loron ida han dala rua, mínimu, la han liu kedas... I hau fiar, la’os hau nia inan-aman deit, sei iha ema barak mos hanesan ne’e.
Sei hanoin hela, derrepente telefone lian, telefone ne’e husi mãe iha Timor. Tesi lia uitoan, hau husu kedas, “tamba sa imi forte nafatin? Hamnasa kontente hela deit, maske dalaruma imi han dala ida deit iha loron ida?”
“Oan, hatene o iha nebá eskola diak hela, ne sufisiente ona ba ami atu moris loron ida. Kona-bá hahán, ami toman tiha ona uluk funu iha ai-laran...O nia saúde diak, estudu la’o diak, ba ami to’o ona”
Hmm.. hau sei dúvida, maibé koko atu kumpriende..Hau husu fali, “Mae, nusa lakohi han para saúde diak? Uluk ami sei kiik, imi kesi kabun atu ami hetan edukasaun diak, até kuandu ami husu na’an imi dehan, orsida selu imi nia ekola hodi saida tan? Agora ami ida-ida iha ami nia fatin, haruka osan ba imi, atu sosa hahán diak hirak nebé uluk imi la konsege hola, imi la han fali? Saida los mak imi hakarak?”
“La’os lakohi oan, agora tempu atu goza duni maibé la’os hahán. Ami han na’an, tensaun sa’e maka’as halo ami nia vida badak, ami han modo tanan, tolan ba la tun... naumedigas ami atu tolan etu maran?” Hau hamnasa maibe konfuzan hela.
Maske konfuzuan, maibé pelu menus, agora hau kumpriende uitoan tamba sa dalaruma sira lakohi han. Hau hatán fali ba, “entaun mae, se hanesan ne’e, lalika tan halo natar ho toos ona, halo ba mos atu fó han se?...ba imi nain rua nia kabun deit, alin sira sei bele sustenta, hau mos sei bele haruka stipend rohan oan sorin karik imi presiza”
“Hahahaha,” Mae hatán ho hamnasa, “haluha tena, tinan-tinan ami sempre fó fos-rai ba imi, no hau nia bei-oan sira gosta liu fos rai duke imi nia fos loja? Haluha tena katak natar oan ne’e mak hodi sustenta ita hotu nia moris durante ne’e no mos imi nia edukasaun husi kiik? Haluha tena katak dalaruma imi sibuk liu ho buat seluk, sosa buat seluk ou sibuk rai osan atu halo ka sosa buat ruma, to’o haluha tiha imi nia kabun? Haluha tena katak, uluk ita ba konsulta, doutor dehan, ami tenki halo ezersisiu? Naumedigas oan hakarak ami atu ba fali gym, ou halai dader loraik.. ami nia ezersisiu mak toos no natar ne’e. Ami hakarak book-an hela deit hodi hein imi... maibé ami la hakaas-an ona hanesan uluk... koko tuir ami bele, haka’as uitoan deit maibé halo ami sibuk nafatin. Ikus liu, se ami la book natar ne’e, no abandona hela, la kleur ema okupa ona, tamba laihá ema seluk mak atu haré tan.. Imi hotu hela dook husi ami.”
Rona litani naruk ne’e, hau koko foti konkluzaun.. Afinal imi la peduli kona-ba hahán ba imi nia-an maibé sei peduli nafatin hahán ba ami oan sira... no imi nia bei-oan sira
Hau hakruuk nonok deit, la hatene atu hatán tan saida.. hahán ne’ebé hau prepara hela iha hau nia oin atu han ne’e, derrepente sente nia gostu lakon tiha.. Hau mos sente katak, hau presiza estuda barak tan husi valór morisa nian husi Sira (inan-aman).
Ikus liu, MOSU IHA HAU NIA OIN, ‘SAIDA MAK SIRA BELE GOZA TAN, ATU HALO SIRA KONTENTE MAIBÉ LA’OS HAHÁN?’ hau sente hau iha ona nia resposta... Hmm
Hakerek nain
Hakerek nain
Bill Soares
0 comentários: